ချစ်သူ.....သို့

အရင်လို မတောက်ပတော့တဲ့ချစ်သူရဲ့ဝမ်းနည်းမှုအပြည့်နဲ့ မျက်ဝန်းအစုံကိုမြင်လိုက်ရတဲ့နောက် ရင်ထဲမှာနင့်တင့်တင့်ခံစားလိုက်ရတယ် ။ ချစ်ခဲ့ကြတဲ့အချိန်တွေက ဆယ်စုနှစ်တွေလောက် မကြာခဲ့ကြပေမယ့် ဖြတ်လို့မရတဲ့ချည်နှောင်မှုသံယောဇဉ် နဲ့ အနှိုင်းမရှိတဲ့ အချစ်တွေ ပိုင်ဆိုင်ခဲ့ကြတယ်နော် ။ ဟိုး...အတိတ်ရဲ့ အရိပ်တွေကို ပြန်တွေးမိတိုင်း ကြည်နူးပျော်ရွှင်ခဲ့ရသလို အမှတ်တရတွေရှိနေ တဲ့ အတိတ်ရဲ့ရပ်ဝန်းတစ်နေရာကို ဖြတ်သွားတိုင်းလည်း လွမ်းဆွေးနေရသလို ၀မ်းနည်းလို့ မျက်ရည်ဝိုင်းရသေးတယ် ။ ချစ်ခဲ့ကြတာ မုန်းကြဖို့မှ မဟုတ်ပဲနော် ။ ဘယ်တော့မှမေ့လို့မရနိုင်ပေမယ့် အနားမှာလည်းရှိမနေပြန်ပါဘူး ။


ညှိုးရော်နေတဲ့ မျက်ဝန်းအစုံနဲ့ ကြည့်လိုက်တဲ့ မင်းမျက်ဝန်းက ဘာသာစကားတွေကို ငါဘာသာပြန်နိုင်ခဲ့ပါတယ် ချစ်သူရယ်...။ စကားဆိုဖို့ အင်အားမရှိနိုင်တော့အောင် မင်းကိုခံစားစေခဲ့ပြီပဲ ။ တမင်မရည်ရွယ်ခဲ့ပေမယ့် မင်းကိုရက်စက်သလိုဖြစ်ခဲ့မှုတွေအတွက် အဝေးကပဲ အသံတိတ် တောင်းပန်လိုက်ပါတော့မယ် ။ ချစ်ခဲ့ကြတဲ့ နှလုံးသား အချင်းချင်း နားလည်ရင် မင်းကြားနိုင်မှာပါ ။


အချစ်ဆိုတာ ဘ၀ မဟုတ်ဘူး တဲ့ ...ငါကြားဖူးတယ် ။ အဲဒါကို ငါလက်ခံလိုက်ရတော့မယ် ။ ငါ့ရင်ဘတ်ထဲက အချစ်တွေက မင်းအတွက်ဖြစ်ခဲ့ဖူးတယ် ။ အဆုံးစွန်လည်း ချစ်ခဲ့တယ် ။ ငါတို့တွေ ပျော်ခဲ့ကြတယ်နော် ။ ဖြတ်သန်းလာခဲ့ကြတဲ့ အချိန်တွေက ခက်ခဲကြမ်းတမ်းခဲ့ကြသလို ရယ်စရာတွေ ပျော်စရာတွေ စွန့်စားမှုတွေနဲ့ အရာရာကိုငါတို့နှစ်ယောက် ရင်ဆိုင်ခဲ့ကြတာတွေကို ပြန်တွေးမိတော့ အတိတ်ရဲ့အရိပ်တွေကို ပြန်လိုချင်နေမိတယ် ။


အမုန်းစကား တခွန်းမှ မဆိုရပါပဲ ခွဲခွာကြရမယ့် ငါတို့နှစ်ယောက်အတွက် အခွင့်အရေးတစ်စုံတစ်ရာများ ရှိခဲ့ရင် နောင်ဘ၀ဆိုတာ ကိုတော့ မရဲတရဲနဲ့ ဆုတောင်းလိုက်ချင်မိတယ် ။ အရာရာကိုခွင့်လွှတ်တတ်တယ် ဆိုးသမျှကိုလည်း မငြိုငြင်ခဲ့တဲ့ မင်းရဲ့အချစ်တွေ ကိုငါ့နှလုံးသား ပြတိုက်မှာ ထိန်းသိမ်းထားမယ်ဆိုတာ မင်းကိုသိစေချင်လိုက်တာ ။

အမှတ်တရတွေကို ဘယ်တော့မှ မမေ့ကြေးနော် ချစ်သူ...။ မင်းကိုချစ်ခဲ့မိတာ ဘယ်တော့မှနောင်တ ရမနေဘူးဆိုတာ မင်းသိနေပါ ။ငါတို့အတွဲဟာ သိပ်ကိုလိုက်ဖက်ခဲ့တယ်နော် ။ လိုက်ဖက်ညီတဲ့ ချစ်သူတွေဖြစ်တဲ့အပြင် ငါတို့ရဲ့မျက်နှာသွင်ပြင်က ဆင်တူရိုးမှားနဲ့ ရုပ်ချင်းဆင်တယ်တဲ့ တွေ့တဲ့လူတိုင်းက ပြောကြတယ်နော် ။ ပါးချိုင့်လေးနဲ့ ပြုံးနေကြတဲ့ ငါတို့ရဲ့ ပထမဦးဆုံး ဓါတ်ပုံလေးက သက်သေပေါ့ ။

အတိတ်ရဲ့ခြေရာတွေကို ပြန်ကောက်ဖို့ ကြိုးစားနေမိပေမယ့် မဖြစ်နိုင်မှန်းလည်း ကိုယ်တိုင်သိနေတယ် ။ အရာရာကိုနောက်ပြန် ဆုတ်လို့ရမယ် ဆိုရင်လေ ငါမင်းကိုလုံးဝ ချစ်ခဲ့မိမှာ မဟုတ်ဘူး ။ ဆုံမှတ်မရှိတော့တဲ့ မျဉ်းပြိုင်နှစ်ကြောင်းကို ဆက်လျှောက်ရမယ့် ငါတို့ရဲ့အနာဂတ်တွေအတွက်တော့ ငါဝမ်းနည်းနေဦးမှာပါ ။


သားကောင်းတစ်ယောက်ဖြစ်တဲ့မင်းက ချစ်သူကောင်းတစ်ယောက်လည်း ဖြစ်နေပြန်သေးတယ် ။ မယုံနိုင်စရာကောင်းလောက် အောင် မင်းရဲ့အချစ်တွေက သက်သေပြခဲ့ပြီလေ ။ ငါ့ဘက်ကိုနားလည်ပေးနိုင်ခဲ့တာကိုက မင်းရဲ့အတ္တမဆန်တဲ့ ချစ်ခြင်းသက်သေ မိုင်တိုင်တစ်ခုလေ ။ မင်းဟာငါ့အတွက် ဂန္တ၀င်ချစ်သူပေါ့.... ။

ငါမင်းကိုနောက်ဆုံးစကားတစ်ခွန်းပဲပြောချင်တော့တယ် ။ အဲဒါကတော့ “သိပ်ချစ်တာပဲ ချစ်သူရယ်....“ တဲ့လေ ။ မင်းကြားနိုင်ပါစေကွာ......။

ငါ့နှလုံးသားထဲမှာတော့ ဂျူလိုင်မိုးနဲ့အတူ သဲသဲမဲမဲရွာသွန်းလို့ မင်းကို တမ်းတနေဦးမှာပါ ။

အနမ်းတွေအစား အလွမ်းတွေ အစားထိုးလိုက်ရပေမယ့် ...မင်းရဲ့လှပတဲ့မနက်ဖြန်တိုင်းမှာ အရာရာ အဆင်ပြေနိုင်ပါစေ ချစ်သူရေ......။